WeKi's Blog

Blog

  • Bsuech und e Zeigfinger

    Dr hüttig Tag het nid grad guet aagfange. Bim ufklappe vom Chinderwage het dr Jonas mit sim Zeigfinger grad ins Scharnier zeigt, wo dr Papi s’zuklappt het. Das het vieli Tränli geh! Au zobe no het’s weh to, trotzdäm het dr Jonas bim Pfläschterli Wächsel tapfer aneghebt! Die drei Medizinal-Smarties hän uf all Fäll ganz schnäll gwirkt…
    Wie geschter scho aakündigt hei mit hüt Bsuech us em Mittelland becho. MaPa us Rothrischt hei ihres GA wieder einischt meh usgnützt und sind eus cho bsueche. Em See entlang sind mir gmüetlich nach Locarno spaziert. Unterwägs hets super früschi Sandwich vo dr Ma und feine Schoggichueche vo MaPa geh.
    Bim Poschte hei mir denn no e prominänti Begegnig gha. Mit eus im Lift und im Coop isch dr Chaschperli unterwägs gsi. Was dr Chasperli? Doch genau dä, oder zumindescht em Chaschperli syini Stimm. 😉 Tra, tra, trallala…
    RoMaJo

    20111010-220132.jpg

  • Spielplatz-Teschter

    Was macht me amene windige Sunntig als anderthalb Jährige Lusbueb am beschte? Genau: Rutschbahne und Rytiseili usprobiere.
    So sy mir hüt uf drei verschiedene Spielplätz gsi. Uf jedem hets für e Jonas viel z’entdecke geh. Gigampfe zämme mit Mami und Papi, Rytiseile und natürlich die viele Rutschbahne abe rutsche.
    Uf em Camping hei mir ringsum wieder Nochbere. Es het no erstunlich vieli Lüt. Die ganze Aargauer, St. Galler, Zürcher und Baselbieter sind klar in dr Mehrheit. Im Lädeli merkt me aber dütlich, dass es richtig Saisonänd zue goht. Es het solangs het….
    Morn bechöme mir Bsuech, mehr denn aber bim nöchschte mol.
    RoMaJo

    20111009-213334.jpg

  • Südwärts

    Also mit däm han ich nid grächnet: Anderthalb Stund Stau am Gotthard. Wäg em Schnee isch au dr Pass scho zue und in Airolo hett denn au scho fascht e erschte Schneepflueg tescht chönne stattfinde.
    Mit verschpötig sin mir denn aber trotzdämn am Ziel acho.
    Dir wüsset jo gar noni wo mir hi hei welle. Mir hei em Wättermacher Bucheli traut und sind drum doch nomol ins Tessin gfahre. Mir würde gärn no e paar schöni, warmi Täg verbringe. Mir sind noni parat für Skifehrie Feeling. (Es gäbi do ganz agfrässeni Camper wo au afangs Oktober scho gärn im Schnee sitze….;-) (Namen der Redaktion bekannt))
    Und wenn scho Tessin, denn gits nur ei Ziel:
    Tenero Campo Felice….
    Mit dütlich mehr Routine als no im Juni hei mir denn eusi fahrendi Villa mit sammt Vorzält ufbaut und iigrichtet.
    Au do isch dr Summer vorbi aber immerhin het do d’Sunne gschune, was me sich i Schneegestöber vo Airolo gar noni het chönne vorstelle.
    Bim ufstelle hei mir euses Zält guet müesse hebe. Es isch e böige Wind über e Platz gfägt.
    Dr einzig wo nach all däm no het möge schaffe isch dr Jonas gsi. Är het bim Znacht gmolt und e Farbstift-Skulptur baut…
    Jetzt gits nur no eis: Ab ins Bett.
    Guet Nacht
    RoMaJo

    20111008-212738.jpg

  • Entscheid ist gefallen

    Mir hei eus eintschiede. Do dr Bucheli im Süde besser mäldet, fahre mir au dört hi…
    Mehr denn scho bald… Jetzt heisst’s packe!

    Regen

  • Herbstferien 2011

    Bald isch es so wyt!
    Zum zweite mol fahre mir mi eusem Wohnwage in d’Ferie.
    Dr Jonas isch uf alli Fäll bereit!
    RoMa

    20111005-114923.jpg

  • Das sind no Zyte gsi

    Also 2008 isch einiges no anderscht gsi als im 2018! Dr Blog isch es PHP Programm gsi, wo via PoP3 sini neue Biträg igläse het. D’Bilder vom Nokia E70 sind au no rächt bescheide gsi. Unscharf und verschwumme.

    Und trotzdäm: Es isch dr Afang gsi, vo mini Ferie-Blog’s.

    Als ganzes Archiv git’s dr Blog au no do als PDF: RoMa’s Reise – Blog

  • RoMa-Express


    Das isch expressmässig gange:
    Vo Rothrist nach Olten, denn entspannendi 6 Minute im FLIRT nach Tecknau und denn als RoMa-Express s’Tal durab richtig Heimat. D’Ro Loki het dr Ma-Ahänger zu Höchschleischtige chönne azieh..
    So sind mir nach 315 gfahrene Kilometer wieder guet deheime acho.

    Bis zum nöchschte Johr,
    RoMa

  • Rothrist

    Wenn mr scho bi de Traditione sind, wei mr nach em Träffe mit ToSy au grad in dr richtige Reihefolg wytermache…
    Vo Rüttene us isch es denn nomol 45Km bis uf Rothrist gsi.
    Mit es paar Sightseeing Abstächer (Originalton Ma), sprich ofizieller Veloroute, sind mr uf schnällschtem Wäg, sprich Haupt- und Näbestrosse, zu PaMa Kissling gfahre.
    Nach enere erfrüschende Duschi si mir mit emene feine z’Nacht verwöhnt worde.
    S’Dessert isch klar en Agriff uf Eusi abgstramplete Kalorie gsi!
    Jetzt freue mir is uf e Nacht imene richtige Bett…
    RoMa

  • Brunch

    Do euses „Canadaträffe“ grad eso uf em Wäg gläge isch, sy mir hüt am Morge vom Camping in Solothurn imene churze Bärgsprint uf Rüttenen gschpurtet.
    Im neue Dehei vo Sybille und Thomas hets e super Brunch geh. Andrea und Roger hei mit ihrem Birchermüesli (ganz ohni „artificial Flowers“ 🙂 ) au no e feine Bitrag gleischtet. Merci!
    D’Feriebilder vo ToSy hän zumindescht bim Ro scho echli Canadaweh usglöst…
    Ei grosse Vorteil vo euse Ferie isch aber nid vo dr Hand z’wyse: Eusy Ferie sind au das Johr CO2-neutral…
    (Abgseh vielicht vo eusem persönliche Metan-usstoss 😉 )
    RoMa

  • Grüesse

    Es isch also scho no interessant : Au bi de Velofahrer gits verschiedeni Lager. Das heisst es git Rennvelofahrer und anderi.
    Rennvelofahrer grüesse Turefahrer grundsätzlich nid. Anderi Velofahrer grüesse sich uf de Velowäg. Hüt hei mir zu dere Regle denn au no d’Usnahm gfunde: Rennvelofahrer mit Bart grüesse.

    Vo Bärn us sy mir mit dr RBS bis nach Solothurn, wo mir jetzt au nomol euses Zält ufgschlge hän…

    Jetzt hei mir grad es feins Znacht in dr Altstadt gnosse…

    RoMa

  • Express

    Nach viel Gegewind bi dr Talfahrt (vorallem d’Ma het vo mim Windschatte chönne profitiere) sy mir jetzt im IC nach Bärn unterwägs.
    Knapp hei mir für eusi 2 Lastesel no platz gfunde….
    Vo Bern us gohts denn no wyter…
    RoMa

  • Ziel erreicht

    Uff, mir heis gschafft. D’Ma het zwar gfunde, mini Sightseeing Usflüg wäre denn scho nid nötig, dr bi sy mr jo nur em Velowäg gfolgt.. 😉
    Nach insgesammt 183 Km hei mir Euses Ziel d’Länk erreicht. Trotz churze Gwitter sy mir, abgseh vom eigene Schweiss, fascht troche acho. S’Vordach bimene Coiffeur und e Flugzüg Hangar (diräkt näbeme Hunter) hei eus als Unterstand dient.
    Jetzt gniesse mir 2 Tag mit Nicole, Rahel, Noah und Jaron in dr Länk.
    Es feins Kaffi im Kuhnen und öppis drzue lyt nach dene Strapaze allemol drin…
    RoMa