Also 2008 isch einiges no anderscht gsi als im 2018! Dr Blog isch es PHP Programm gsi, wo via PoP3 sini neue Biträg igläse het. D’Bilder vom Nokia E70 sind au no rächt bescheide gsi. Unscharf und verschwumme.
Und trotzdäm: Es isch dr Afang gsi, vo mini Ferie-Blog’s.
Als ganzes Archiv git’s dr Blog au no do als PDF: RoMa’s Reise – Blog
Das isch expressmässig gange:
Vo Rothrist nach Olten, denn entspannendi 6 Minute im FLIRT nach Tecknau und denn als RoMa-Express s’Tal durab richtig Heimat. D’Ro Loki het dr Ma-Ahänger zu Höchschleischtige chönne azieh..
So sind mir nach 315 gfahrene Kilometer wieder guet deheime acho.
Bis zum nöchschte Johr,
RoMa
Wenn mr scho bi de Traditione sind, wei mr nach em Träffe mit ToSy au grad in dr richtige Reihefolg wytermache…
Vo Rüttene us isch es denn nomol 45Km bis uf Rothrist gsi.
Mit es paar Sightseeing Abstächer (Originalton Ma), sprich ofizieller Veloroute, sind mr uf schnällschtem Wäg, sprich Haupt- und Näbestrosse, zu PaMa Kissling gfahre.
Nach enere erfrüschende Duschi si mir mit emene feine z’Nacht verwöhnt worde.
S’Dessert isch klar en Agriff uf Eusi abgstramplete Kalorie gsi!
Jetzt freue mir is uf e Nacht imene richtige Bett…
RoMa
Do euses „Canadaträffe“ grad eso uf em Wäg gläge isch, sy mir hüt am Morge vom Camping in Solothurn imene churze Bärgsprint uf Rüttenen gschpurtet.
Im neue Dehei vo Sybille und Thomas hets e super Brunch geh. Andrea und Roger hei mit ihrem Birchermüesli (ganz ohni „artificial Flowers“ 🙂 ) au no e feine Bitrag gleischtet. Merci!
D’Feriebilder vo ToSy hän zumindescht bim Ro scho echli Canadaweh usglöst…
Ei grosse Vorteil vo euse Ferie isch aber nid vo dr Hand z’wyse: Eusy Ferie sind au das Johr CO2-neutral…
(Abgseh vielicht vo eusem persönliche Metan-usstoss 😉 )
RoMa
Es isch also scho no interessant : Au bi de Velofahrer gits verschiedeni Lager. Das heisst es git Rennvelofahrer und anderi.
Rennvelofahrer grüesse Turefahrer grundsätzlich nid. Anderi Velofahrer grüesse sich uf de Velowäg. Hüt hei mir zu dere Regle denn au no d’Usnahm gfunde: Rennvelofahrer mit Bart grüesse.
Vo Bärn us sy mir mit dr RBS bis nach Solothurn, wo mir jetzt au nomol euses Zält ufgschlge hän…
Jetzt hei mir grad es feins Znacht in dr Altstadt gnosse…
RoMa
Nach viel Gegewind bi dr Talfahrt (vorallem d’Ma het vo mim Windschatte chönne profitiere) sy mir jetzt im IC nach Bärn unterwägs.
Knapp hei mir für eusi 2 Lastesel no platz gfunde….
Vo Bern us gohts denn no wyter…
RoMa
Uff, mir heis gschafft. D’Ma het zwar gfunde, mini Sightseeing Usflüg wäre denn scho nid nötig, dr bi sy mr jo nur em Velowäg gfolgt.. 😉
Nach insgesammt 183 Km hei mir Euses Ziel d’Länk erreicht. Trotz churze Gwitter sy mir, abgseh vom eigene Schweiss, fascht troche acho. S’Vordach bimene Coiffeur und e Flugzüg Hangar (diräkt näbeme Hunter) hei eus als Unterstand dient.
Jetzt gniesse mir 2 Tag mit Nicole, Rahel, Noah und Jaron in dr Länk.
Es feins Kaffi im Kuhnen und öppis drzue lyt nach dene Strapaze allemol drin…
RoMa
Au eusi Gaschtgäber sind letscht Nacht vom Gwitter überrascht worde. Heftig isch es über eus gsi. Zumindescht Blitz und Donner. Räge hets denn gar nid eso viel geh.
Am morge sind mr denn no mit emene feine Zmorge im Buch gschtartet.
Inzwüsche sind mr bereits via Thun und Wimmis ins Simmetal iboge.
An dere geniale Schweizer Familie Füürstell uf em Bildli gniesse mir grad Euse Mittagshalt.
Es sind scho einigi Höhemeter hinter eus, doch eis isch sicher: Es het no einigi Stigige vor Eus.
RoMa
Nach 105 Km und total 752 Höhemeter sind mr uf em Hund..
Vom Hauestei isch es via Balsthal, Wangen a.A., Biberist, Kirchbärg, Burgdorf, Schafhausen bis nach Geysenstein wyter gange.
Do sy mr uf dr Glauser – Ranch abgschtige.
Falls Dir das uf dr Charte nid findet, was durchus chönnti sy, do no die genaue Koordinate vo eusem Zält:
612.029
194.339
Jetzt freue mir is uf’s Z’Nacht mit Elisabeth und Thomas…..
Wenn gwüssi erscht afange schaffe, si mir scho bim Znüni uf em obere Hauestei acho.
Jetzt folgt denn grad dr beschti Teil vo hütte: D’Abfahrt nach Balsthal…..
Jetzt gilts ärnscht. Nach dere Stärkig gohts denn scho gli los.
Mir hoffe, dass eus die Gwitter in rueh lön und mir möglichscht troche chönne fahre.
RoMa
Nach emene churze Endspurt über e untere Hauestei sy mir hüt Nomitag guet wieder dehei acho.
Total hei mir in de letschte 9 Tag 475 Km im Sattel verbrocht. Eusi Hintertteil hei sich in dere Zyt guet an d’Sättel gwöhnt. Ansunschte hei mir weder Muskelkater no sunschtigi Velospezifische Beschwärde z’beklage.
Inzwüsche sy eusi Dohtesel abpackt und im Stall, eh Garage versorgt.
Au Ro + Ma hei e usgibigi Duschi gnosse. D’Ma kämpft jetzt no mit ihrer Verchältig, wo si sich geschter igfange het….
Gfreut hei eus au Euchi Reaktione, liebi Blog-Läser! Merci für Euches Interässe!
Natürlich hei mir nid über alles gschriebe, denn nur so hei mr no e paar Gschichtli und Anekdote wenn mir is bi Glägeheit wieder gsehn….
Liebi Grüessli
RoMa