Kategorie: 2017

Au in däm Johr isch d’Zyt viel z’schnäll umme gange. Sogar d’Ma het sich ans Südtirol gwöhnt und wär denn no gärn länger blibe. Aber all das nützt nüt. Dass d’Chinder grösser wärde merkt me au bim ufrume. Es wird eifacher mit allne drü. Dr Jo und Ja putze Hering und d’Ro hilft hebe bim Schürze putze… So hei alli ihri Ufgob. Zumindescht zytewys. Mit em Blick uf e Rägeradar hei mir in 3. Gang gschalte und s’Zält möglichscht gli zämme gno. Gschafft. Wo’s agfange tröpfele het isch alles sowyt zämme und im trochene gsi. Wieder emol Glück gha!

Zrugg sind mir denn wieder dr glichi Wäg gfahre wie bi dr Hireis. S’Wätter isch au öppe glich gsi. So het sich s’Engadin vo dr hässliche Syte zeigt. Vo über 25’C im Südtirol uf 12’C in Zernez. Brr!!! Do i keini Schneekette drbi gha ha, isch klar gsi, dass mir wieder uf e Verlad gönge. Zämme mit em spötere z’Nacht im Heidiland zwei türi Späss in Franke pro Minute grächnet. 

Dank em Mover stoht denn sogar bim usrume nümm alles schreg:

Inzwüsche sin 5 Maschine Wösch gwäsche, tröchnet und zämme gleit. Dr Wohnwage isch au putzt und parat für e nöchscht Isatz im Herbscht. 

(Camper mit automatischer Sat Schüsse unter Baum)
Also hüt hei mir wieder emol chönne beobachte, wie anderi bim Campe ihri Prioritäte setzt:

1. Camper uf dr Parzälle quer stelle, so dass es 5 Minute motoret

2. Sat Spiegel ufstelle und dr Satelit automatisch lo sueche

3. Sich nach dr 3 Rundi vom Spiegel langsam afo närfe und zur Beruhigig schnäll e Zigi aazünde. 

4. Zigi wäg und wieder dr Motor aalo drmit me dr Camper e Meter wyter näbene Baum bringt. 

5. Sat Spiegel wieder ufrichte und e neue Versuech starte. 

6. E chline Freudesprung mache wo dr Spiegel ändlich stoh blibt. 

7. D’Kabelrolle uszieh um au dr TV mit Strom chönne z’versorge um s’Bild chönne kontrolliere.  

8. Feschtstelle dass dr Camper gar nid grad stoht. 

9. Nomol afange Motore dass dr Camper uf d’Blöck ufe chunnt und dass er so öppis wie grad stoht. 

10. Nomol kontrolliere öb dr Sat Empfang immer no guet isch. 

11. Teppich usbreit

12. Sunnestore vo Hand usekurble (Chönnti me süscht sicher au elektrisch ha!)

13. ……..
D’Chinder hei hüt nomol chönne mit dr Marni spiele, bevor s’hüt zobe zumene härzzerrissende Abschid cho isch. 

Au bi eus gohts langsam ums Rume. Die erschte Sache sind bereits verstaut. 

Jetzt hoffe mir morn uf trochäs Wätter, dass au s’Zält no troche in dr Täsche landet. 

E vorussichtlich letschti Wanderig isch hüt uf em Programm gschtande. Dr Gumperle Wäg. E Rundwäg mit vielne Pöschte wo d’Waldmuus Ferdinand Sache vo de andere Waldtier erklärt. Uf em Wäg zum Rundkurs sy mir über e Wallfahrtswäg gloffe. E Umwäg, aber vor allem dr Jo isch sehr interessiert gsi an dene Holztafele. 

Uf em eigentliche wäg denn, isch d’Ja dr gröschti teil sälber gwanderet. Schliesslich het jo au sie cooli Wanderschueh a. Bim „Dachsbau“ het d’Ma denn die feine Sandwich us em Rucksack zauberet. D’Ja het sich immer wieder müesse versichere, dass de Dachsbau numme zum spiele isch. (Zum Glück hei mir usser Waldameise keini andere, grosse läbige Tier aatroffe!)

Die gsammlete Stäckli het d’Ma denn, zämme mit em Jo, in es währschaftigs Floss verwandlet. Im Abwäschbecki hets bereits e erschte Schwimmtest mit Bravour bestande. 

Hüt isch euses Auto zum zweite Mol zum Zug cho. Mir sind nach Meran go shoppe. Es Manko vo de letschte sächs Johr hei mir besytigt. Ändlich hets bi eus im Wohnwage au e Wöschständer. Scho mol dört, si mir denn in d’Meraner Therme go bade. Eusy Äss-Zyte sind in denne Ferie rächt verschobe. Das git bim Heimcho sicher e rächte Jet-Läg… Am achti zobe sind mir so zum Gourmet Tempel go z’Nacht ässe.  

Nach so emene asträngende Tag isch am nöchste Tag Erholig aagseit gsi. Au rund um e Wohnwage isch immer öppis gloffe. 

Dr Samschtig het nomol dr letschti Hitzetag versproche. Drum isch nomol Badi uf em Programm gschtande. Eusi chlinschti isch die gröschti Wasserratte vo allne! Mit Flügeli üebt sy jetzt scho dr Ruggeschwumm. Uf de Rutschbahne hei denn wiedr alli ihre Spass gha. Mit em 1.20 Meter tiefe Becki isches genial für eus. Dr Jo cha stoh und tauche und RoJa schwimme mit de Flügeli sälbständig umme. So chömme alli uf ihri Rächnig. 

Am Sunntig isch den das wächselhafte Wätter do gsi. Immer wieder hets emol grägnet. Langi Zyt sind mir aber glich vor em Zält usse gsi und händ s’Camperläbe gnosse. D’Ro fahrt mit ihrem grosse Velo scho sehr guet umme. Schad, dass es do kei Rundwäg git. Momentan isch es au zobe no so Warm, dass mir chönne im Zält sitze.

Do um Prad rächt viel Nationalpark isch, gits au nid so viel Uswahl an Seilbahne. Uf e Tipp vo Lüt uf em Camping si mir uf e Watles gange. Vo 917 Meter über Meer per Auto uf 1750 und denn mit em „Eilbänli“ (Zitat:Ja) uf über 2100. Uf dere Höchi obe hets e Badesee mit villne Aktivitäte. Mir sind vo dört us no e Stück wyter dr Bärg uf gwanderet. Näb em Pfaffensee isch grad es Bänkli mit super Ussicht ins Tal frei worde. Die Glägeheit hei mir is nid lo neh und so hei mir bim Picknik vo wytem au no es paar Gleitschirmpilote bi ihrne Vorbereitige und Start chönne beobachte. D’Thermik isch super gsi, so guet dass es eine bis zu de Wolke gschafft het. 

Uf dr Bärghütte isch denn Apfelstrudel (mit oder ohni Vanillesauce), Glacé oder e heissi Schoggi zum Zvieri agseit gsi. 

Zrugg ins Tal sy mir trennti Wäg gange. MaRoJa wieder mit em 4er-„Eilbähnli“ und RoJo mit emene 3-rädrige „Go-Cart“. Das hett Spass gmacht!

Au in de Bärge chas heiss wärde. So isch hüt dr Bsuech im Prader Schwimmbad aagseit gsi. Am Vormittag isch es no guet gsi mit de Lüt. Alli 3 hei dr Plausch am aberutsche gha. Chum dunde, scho wieder am Start. Nach 3 Probeläuf mit em Jo isch d’Ja wie verbisse sälber go rutsche. E mega Spass. 

Am Obe isch es Konzärt vo dr Musikkapelle Eyrs uf em Hauptplatz agseit gsi. Me hets bis zun Wohnwage ghört. So isch dr bereits pitschleti Jo nümme z’brämse gsi und het sich nomol aagleit. So sind RoJo no zumene Platzkonzärt cho, währenddesse d’Ma zu RoJa gluegt het. 

​​

Musikkapelle Eyrs mit dr Fuchsgraben Polka (Video folgt…..)

Hüt isch e aagwöhnigs Spatziergang uf em Programm gsi. Mir hei e chlini Wanderig quer dur s’Tal gmacht. D’Natur im „Prader Sand“, es Flussdelta vom Suldenbach, isch ganz speziell. E Eisvogel hei mr aber leider nid entdeckt. 
Am Fischerweiher hets denn uf em Spielplatz es Picknick geh. Zrugg sy mir dr glich wäg dur die brennendi Sunne gange. 

Zobe hets, nachemene Zwüschefall in dr Chuchi, es internationals Znacht vom Grill geh: Bärner Würstli im Späckmantel us Österreich, gässe in Italie mit em vom Unfall übrig blibene Salat. 

Us de Sicht vo de Ma:Hüt Morge schint de Ro in de Zytmaschine duscht z ha. Nach em grosse Wäschgang isch mir uf jede Fall e Jüngling begegnet im Vorzelt. Grad bevor ich ha welle froge, was er do suechi, het sich dä jungi Ma mit de altbekannte Stimm vom Ro bemerkbar gmacht. Sit 12 Johr het er e Schnauz gha und hüt Morge het dä Oberlippebart offebar plötzlich müesse verschwinde. I ha mi augeblicklich 12 Johr zrugversetzt gfühlt. De Kommentar vo de Jana: „Papi jetzt bisch nümm stachlig“. Und ich ha chum chönne glaube, dass ich mit dem junge Ma scho so e grossi Familie ha!

Zum Glück het d’Ma eusi Reiseapothek rych bestückt. Dr Ja isch es nur mit Zäpfli einigermasse guet gange. In dr Nacht isch nur s’Mami rächt gsi. Wo ich zu ihrem Bett cho bi, het sy in de höchschte Tön afo chreie. Super mit zwei schofende Chind und Nochbere nur es paar Meter näbe dra. So hei mir die erschte 3 Ferie Täg sehr ruhig aagange. Quasi UWU. (Um e Wohnwage umme)

Es isch spannend wie sich do 3 Kulture mische. Alles isch zweisprochig agschribe und d’Lüt rede e luschtige Dialäkt. Es chunnt eim überhaupt nid wie Hochdütsch vor. Bim poschte fühle mir eus wie in Österreich. E MPreis isch in Jana Fuess-Distanz vom Camping wäg. Do fühlt me sich wie im Zillertal: Milch und Joghurt gits vo dr Erläbnis-Sennerei. Dr Ma ihri Lieblings Joghurt hets sogar!

Uf em Camping hets nur Chinder us Deutschland. Sogar d’Ja probiert ihres beschte Hochdütsch us. Süss. Irgendwie verstönde si sich eifach.  

Irgendwie wird das vo Johr zu Johr mehr zum Packe. 

Das muess aber es Gfühl sy, denn mir Packe syt Johre nach dr gliche Lischte. 

So e paar Sache sind aber au vo dr Lischte verschwunde: Kinderwagen, Schoppefläsche, usw. 

Chriblig sind alli drei Chinder gsi und im Helfer Drang. Das machts nid immer eifacher bim packe…..

Uf dr Raststätt Heidiland isch denn Znünipause agseit gsi. S’Heidi und dr Geisse-Peter sind au no cho luege. Mir sind scho wyt cho, bis sich die erschte chrankets Symptom zeigt hei. Dr Ja isch es nümme guet gange. So isch dr Jo zu mim Co-Pilot worde und d’Ma zur Pfläghilf in dr Kabine. Die Ufgob isch im dopplete Sinn aspruchsvoller worde: Immer mehr Kurve und dr Ja isch es au nid besser gange.

Bim Vereina Tunnel hets eus just uf 11:50 Zug glängt und nach 20 verrüttlete Minute sind mir im rägnerische Engadin gsi. Wyter über e Ofepass und s’Münstertal sind mir em Zyl entgegegfahre. Nid dr Pass isch d’Useforderig gsi für e Fahrer, sondern die änge Dörfli uf dr italiänische Syte. Solang nüt entgege chunnt gohts jo….

Zu dr fiebrige Ja isch denn au no e Ma mit Dachschade cho. Die wo dänke das syg nüt neus chönne süscht gärn emol e Zältstange uf e Chopf donneret becho.

Chum syn mir mit ufbaue fertig gsi isch denn au Zält und Wohnwage duscht worde. Mir im trochene heis fascht scho chönne gniesse abgseh vo de 40’C Fieber vo dr Ja.