Nachdäm mir vo dr Unterkunft in Andermatt einigermasse enttüscht gsi sind, sy mir geschter zobe buechstäblich verwöhnt worde. Sälbergmachti Chnöpfli, mmhhh!!
Ohni störige vo obe oder näbe dra hei mir au wieder emol e würklich ungschtörti Nacht gha.
Uf däm Wäg nomol beschte Dank an PaMa Kissling für ihri Gaschtfründschaft.
RoMa
Hüt het’s genau drei Gruppe vo Lüt wo dusse mehr oder weniger freiwillig unterwägs sind: Pöschtler, Soldate und RoMa…
Bi eusem Start in Luzärn hets würklich us allne Löcher gschüttet. Entsprächend sy mir au scho gli nass gsi. Die ganze Bäch hän dütlich mehr Wasser gfüehrt als normal.
Bi Emme hei mr d’Wattiefi vo eusne Velos chönne teschte. Inere Unterfüehrig wo mir hei dure müesse isch s’Wasser über 20cm tief gschtande. Ohni Schnorchel isch es no guet gange, nur dr Ma ihri Füess hei es zuesätzlichs Bad gnoh.
Nach de gröschte Stigige het ab Sempach doch s’Wätter langsam erbarme becho. Ab Sursee isch es denn scho fascht guet gsi….
So si mir nach emene Tenuewächsel zumindescht vo usse troche in Rothrist acho.
Nach em Gfängnis gniesse mr jetzt für e Nacht dr Komfort vo dr Ma ihrne PaMa…
RoMa
Im Momänt isch do bi eus das mit em Wätter immer no so e Sach. Mir montiere jetzt denn bald Schwimmer an eusi Velos und chömme denn eso via Reuss, Aare und Rhy heimeszue….
Vorerscht verbringe mr jetzt denn aber nomol e Nacht hinter Schloss und Riegel. Wie’s wyter goht entscheide mir denn morn am Morge.
Guet Nacht
RoMa
Eusi erschti Nacht im Gfängnis hei mir guet überstande. Wenn me die Türe nid vo inne chönnti ufmache würdi die Sach scho no anderscht….
Hüt am Morge sy mir uf all Fäll nid vomene Wärter sondern vomene heftige Gwitter gweckt worde.
Do’s au jetzt nid so amächelig isch hei mir is an e Fänschterplatz im Starbucks verzoge…. (Wenn me do frogt bechunnt me e 30 Minute gratis Internet Zuegang! 🙂 )
RoMa
Gottseidank, hei mir in Hafturlaub dörfe! Nur so isch das spontane Träffe mit Sibylle und Thomas möglich gsi.
Mir hei dä Obe uf all Fäll mega gnosse.
Mit Gfängnischuchi het dä Italiener au nid viel gmeinsam gha…
Nomol beschte Dank an die zwei früsch verhürotete für dä gmüetlich Obe!
Pünktlich zrug zum Zimmerverläse in Zälle 210;
RoMa
Dank em Wätter si mr jetzt no ins Gfängnis cho!
Luzärn het is grad mit emene Gwitter empfange. Nach däm sehr durchzogene Tag het das scho grad uf d’Lune druckt. Entsprächend isch s’Resultat: Drmit mir nid grad in nöchschte Zug heimwärts ghockt sind händ si is ins Gfängnis gschteckt. So teile Ro und Ma jetzt e Zälle mit WC, Brünneli, Duschi, zwei Better und emene Tischli. Eusi Zällenummere isch 210, nur falls is öpper inere küehne Aktion wetti cho befreie oder eus e Chueche mit Feile schicke!
Us Zälle 210
RoMa
Nachdem mr geschter no d’Talfahrt vom Oberalppass hei chönne gniesse, isch hüt s’Wätter nümme ganz uf eusere Syte.
Scho am morge, z’Andermatt no im warme Bett, hei mir entschiede uf euses Furka-Projekt z’verzichte. (Aufgeschoben ist nicht aufgehoben).
Dorum hei mir is nach längerem wehrweise entschiede, dass mir is em Uri-Stier stelle. Bi Gegewind und sehr wächselhaftem Wätter si mir jetzt bis uf Flüele cho.
Jetzt gniesse mir denn scho gli e Schiffahrt Richtig Luzärn….
RoMa
Uf däm Wäg möchte mir em Lars ganz härzlich zu sym hüttige Geburtstag gratuliere. Mir hoffe Du hesch hüt zobe scho no es paar Gäscht, obwohl mir zwei jo unterwägs sind…. 😉
Liebi Griess us em Zwüschehalt Disentis
RoMa
Wie dir em Bild entneh chönnet, hei eusi Drohtesel Stahlräder becho.
Nochdäm mir vo Buchs uf Chur pedalet si, isch dört scho d’RHB parat gschtande… Und wär cha so es Angebot in Anbetracht vo de Höhemeter wo mr jetzt grad überwinde usschlo?
Us em fahrende RE 1232
RoMa
Chuum si mr wieder es paar Kilometer gfahre, isch in Rorschach bereits dr nöchschti Event gsi. E internationale Sandskulpture Wettbewärb het is aglockt. Wahnsinn was die Künschtler do gschaffe hän. Uf em Bild isch isch dr 2. Platzierti Bitrag, wo aber dr Publikumspris gwunne het.
Vo dört a isch es denn aber gloffe wie gschmiert. Dr Bodesee isch scho bald hinter is gsi. Entlang vom alte Rhy hei mir inzwüsche s’dritte Land erreicht. Im öschterrichische hei mr e paar schöni Kilometer abschpuelt, bevor mr denn als Rhy-Express gschtartet sind. Dank em Ruggewind isch es scho fascht voremenelei gloffe.
So hei mir euses Etapeziel Buchs nach 88 Km scho um die vieri erreicht.
RoMa
So viel Velo-Gegeverchehr hän mr jetzt würklich no nie gha!
Kei Wunder: Zwüsche Romanshorn und Arbon isch hüt au e Slow Up gsi… E mega cooli Stimmig! Aber mir si, wie uf dr ganze bishärige Tour gegene Strom gschwumme…..
So si is hütte nid eifach es paar Velo- und Rollerbladefahrer entgegecho, sondern grad hunderti!
Hüt hei mr e ganz entspannte Tag verbrocht. So richtig zum gniesse.
Bi dr Marion hets die erschte Liche geh und au in mim Buech isch dr Kommisär Hunkeler scho flissig am ermittle.
So isch hüt die gröschti Distanz wo mir zrugg gleit hei, zwüsche Syte 1 und 86.
Amene settige Gniessertag darf natürlich au dr Gaume nid z’churz cho. Do am See isch jo klar was es git: Fisch, natürlich.
Inzwüsche sin per SMS au scho die erschte Froge itroffe:
S.M. us St. wett wüsse:
‚Wie gohts mit Muskelkater und Füdliweh?‘
Muskelkater hei mr beidi nid. Das mit em Hinterteil chunnt denn morn uf em Sattel wieder us…. Bis jetzt würde mir sälbschtverständlich jedi Dopingkontrolle problemlos bestoh!
Morn gohts denn vorerscht emol em Bodesee entlang wyter oschtwärts.
Uf ufmunterndi SMS und Wätterprognose freue mir is jederzyt!
RoMa