Blog

Tja, hüt Vormittag hei mir welle taluswärts fahre. Scho bi dr Uffahrt zur Schnällstroos sind mir in Stau cho. Mir hei bis zur nöchste Usfahrt e gfühlti Ewigkeit brucht. So sind mir entgege eusne Plän nur bis Kaltenbach und dört in M-Preis go iichaufe. 

So isch euses Kaffi-Problem halt immer noni glöst. Nach em Mittagässe, wo d’Ja ändlich gschlofe het, si mir zwei in Beach-Café. Jo und Ro hei mit Fünkli usgrüschtet uf die schlofendi Ja ufpasst. So sind mir doch zumene Cappuccino und enere halb Stund Ferie cho….

Pünktlich zur Brötli-hohl-Zyt hets afo rägne. Mit Schirm bewaffnet isch dr Jonas („Ich wett das lehre….“) mit Ma und Ro ins Lädeli spatziert. Scho bi dr Milch hinde het me müesse aastoh. Dr Platz isch immer no fascht voll. Entsprächend gross isch dr Aasturm uf d’Brötli gsi. 

D’Ro isch zum Wohnwage Bauer worde. Si lehrt grad Lego Plan läse und baue. 

Dank em Räge hei mir so jetzt scho e neui Kaffimaschine. Nur leider passe eusi Tassli nid drunter….

 Churz vor de 12i sind mir uf em Platz, zämme mit enere Horde St. Galler, aacho. D’Frau am Empfang het bi eus s’abkürtze Verfahre chönne aawände: „Sie kenne sich ja aus bei uns…“

Es isch so warm gsi, dass mir eus vor em Ässe hei müesse schatte mache. Aber denn isch es passiert. Nach em z’Mittag hättis selle Kaffi geh. Doch dodrus isch nüt worde. D’Maschine het nume no Lärme gmacht. Kei Tropfe isch use cho. Frust! Zum Glück git’s im Lädeli vorne Schnällkaffi… Kei würkliche Ersatz aber immer no besser als nüt.

Mir sind unterwägs. Bis jetzt hei mir no nüt vergässe und fahre im gmüetliche Wohnwage-Tempo in Richtig Zürich. 
S’Auto schaucklet vor sich ane. Hoffentlich hilft das de Chind zum nomol dr Schlof z’finde. 

Dr Mover het sini Fürprob au bestens bestande. Präzis isch dr Wohnwage bis zur Kupplig sälber gfahre. Zum nume so in d’Ferie fahre, fehlt em denn aber scho dr Turbo-Gang. Uf alli Fäll e super Sach und Erlichterig bim manövriere!

S’Zmorge hei mir äne am Arlberg plant. Eis isch dört verbotte: Es stigt NIEMER über d’Deichsle!

Hüt und isch also ufrume agseit gsi. D’Chinder hei no gschlofe wo d’Hering zoge und gwäsche gsi sind. Denn sind aber scho gli die drü Brämschlötzli um eusi Bei gschwirrt… 
Nach em z’Morge hets für e Jonas gheisse vo sym churzzyt-Ferie-Fründ Tim Abschied z’neh. Syni vietnamesischi het dr Ma erklärt, dass sy wyter fahre entweder nach Kroatien oder Strassburg… Lyt jo alles am Wäg. Ihre Ma chönnti uf all Fäll e Brüeder vom Gmeinipresi Stingeli sy… Ganz nach em Motto: Bei der Geburt getrennt.

Euses Ufrume isch immer wieder dur Ässe unterbroche worde. Z’Morge, Znüni, Zmittag… Mir hei alles troche chönne verstaue.

Denn sy mir nomol ins Hallebad go bade. Die grosse zwei hei’s gnosse und au die Chlini het ihre Spass gha, bis sie z’müed gsi isch.

Nochär sind mir zrugg go dusche… Denn het’s avo donnere…

No Chinderwage und Trotties verlade….

An dr Reception het d’Ma und mir bim Auto viel Geduld brucht… Es het glaub öpper versuecht e Wältreis z’bueche. Chum sind mir losgfahre hei sich die paar Tröpfli in Sturzbäch usgwytet. Bi Fügen hei mir denn bald Schwimmflügeli müesse verteile. Im Gourmet Tempel am Taligang het’s denn z’Nacht geh. Bade und rume macht hungrig!

D’Ja het sich denn bi Innsbruck gar nid drmit abfinde welle, im Maxicosi iizschlofe. So hets 3 halt brucht bis sie schlussändlich in St. Anton am Arlberg definitiv iigschlofe isch.

Über e Pass fahre isch denn bi Dunkelheit und Räge no e Useforderig gsi. Wyter isch es denn mol troche aber meistens nass gange. Wenn mir vo de Ferie heime fahre rägnets irgendwie immer…

Bi Winterthur sind mir denn vom Navi pulsmässig gweckt worde:

Mir hei denn e churze Zwüschehalt iigleit und dr Polizei e Vorsprung geh. Gseh hei mir glücklicherwys kei Geisterfahrer…

Jetzt fahre mir Richtig Bötzberg em Baselbiet entgege.

  
Hüt hei mir’s nomol ruhig gnoh. Nach em z’Morge het d’Ma Muffins bache. Mmhhh! Sind die fein gsi! So het sich dr Transport vo eusem Öfeli doch no mehr als amortisiert. 

Am Nomitag sind mir no ins Hallebad do uf em Platz gange. Jo und Ro hei sich so nomol so richtig chönne im Wasser ustobe. D’Ro isch eifach es Heutier und kennt nüt. D’Chinderrutschbahn am beschte chopfvora abe. Au uf dr grosse Rutschbahn hets gheisse: „nomol!“. Dr Jo isch do scho dütlich zrughaltender. Är goht die Sach viel ruhiger a. 

Es windet hüt dr ganz Tag immer e bitz. Ussert e paar Tropfli isch es aber bis jetzt troche blibe. Das obwohl sy für hüt heftigi Gwitter prognostiziert hei. 

Momentan het d’Ja dr Schlof noni gfunde und wird drum no uf em Platz ume chauffiert. 

Dodermit sind eusi Ferie au scho wieder fascht vorbi. Drum hei mir hüt zobe auch scho die erschte Sache avo verpacke. Jetzt hoffe mir, dass es morn ähnlichs Wätter isch und mir s’Zält troche chönne abrume. 

  
Hüt sind mir nach em z’Morge ist in d’Zillertaler Erlebnissennerei in Mayerhofen. Dört bechunnt me e super Iblick in die ganzi Produktion. Vo obe cha me de Chäser wunderbar bi ihrer Arbet zueluege. Mir hei is nur gfrogt, was für e Meinig die Arbeiter vo de ganze Touriste wo abeluege wohl hei…
Nach em Chees gseht me au no d’Milch Abfüllerei und d’Alieferig. Entlang vom letschte Abschnitt het’s denn Automate wo me die verschiedene Joghurt cha „Genusslöffeln“. 

  
Näbe dra het’s denn no e Schauburehof wo mir natürlich au no sy go aaluege. Geisse und Chüe hets, aber au drü Ponny. 

      
Säuli het’s keini, also emel normalerwys. Uf em Traktor-Parcour het’s denn 4 dütschi Wildsäu gha wo mir dört gsi sind…..

  
Im Aschluss hei mir denn no e Vorrot an feine Zillertaler Joghurt und diversi Chäs poschtet. 

Nach em Päuseli sind mir denn nomol uf Fügen ins Bad gange. Alli fünf heis gnosse. Die dunkle Wolke hei sich zumene Gwitter uftürmt. Bis mir aber wieder use cho sind het’s nur no tröpfelet. 

Zrugg uf em Campingplatz sind mir im Jägerhof go z’Nacht ässe. Irgendwie lustig: Mit eusne drü chline goht das besser als deheime ässe. Die lütischti isch d’Ja gsi. Sie het bim Ässe plötzlich e usgschtopfte Schneehaas gseh und het das lutstark allne müsse mitteile…. Während em Ässe hets denn nomol gschüttet. Und will mir so bravi gsi sind, het’s ufghört und mir hei troche chönne heilaufe…..

Nachdäm mir wieder im Tal gsi sind, hei mir no e Zwüschehalt zum Poschte bim M Preis in Mayerhofen gmacht. Do im Tal unde isch wieder e rächti Hitz gsi. Und so sind mir alli in chüele Lade ine. 
Bi dr Milch isches denn passiert. Will ich no gluscht uf e chalte Kaffi gha ha bin i e paar schritt zrugg und ha dr Wage mit dr Jana im Sitzli lo stoh. Chum han i die Bächer in dr Hand gha, hets grumplet. Dr Jonas am Bode und d’Jana samt Wägeli uf ihm druff. D’Jana het brüelet wie am Spiess will sy mit em Chopf am Bode uftätscht isch. Mir und dr Ma isch s’Härz in d’Hose plumpst! Dr Jonas isch uf d’Harasseablag vom leere Wägeli gchlätteret und het’s so zum Kippe brocht. 

Mit Nuggi und Arnika C30, wo natürlich beides duss im Auto gsi isch, het sy sich denn aber rächt gli beruhiget. E Frau vom Lade isch denn au no mit emene chüele Tüechli cho. Vo Ihre hei mir denn erfahre, dass es im ganze Tal kei einzige Chinderarzt meh git. Es heig aber e Paxis bi dr Poscht, wo au Chinder behandlet…

Do d’Jana sich wieder beruhiget het, hei mir denn dr Ruckwäg aträtte. Do sie bis denn no kei Pfüsi gmacht het isch sy natürlich im Auto iigschlofe. Uf em Camping isch sy denn ufgwacht. Nach em trinke bi dr Ma het si ganz aktiv am Bode gschpilt. Natürlich bewacht, dass sy dr Chopf jo nümm aschlot. Do sy nüt meh dr gliche do het hei die zwei Meitli denn sogar no badet. Au bim z’Nacht het sy guet gässe, so dass mir drvo usgöghn, dass d’Ja mit emene blaue Aug und dr Jo mitemene blaue Mose am Bei drvo cho sind…..

  
Nachdäm mir geschter e Usflug mit dr Zillertalbahn nach Mayerhofen gmacht hei, sind mir hüt mit dr Ahorn Bahn uf 2000MüM gschwäbt. Im Prospekt vo dr Bahn hei mir e 1-stündigi Rundwanderig gseh. Chinderwagetauglich sig sy… So hei mir beschlosse gha die Rundi mit dr Jana im Wägeli z’mache. Es syg jo sicher bequemer eso. Zum Glück het euse Wage grossi Reder. Aber au mit dene isch es zunere Tortur für Mensch und Maschine worde. Wobi mir uf däm Wäg sogar e Rollator gchrützt hei!

Für alli wo s’gliche vor hei: Lönd euche Wage dehei! Mit em Tragrucksack wärs 100 mol besser gange.

Im Aschluss hei mir in dr Bärgstation no dr Sinnespfad gmacht. Das isch en Parcour mit vielne Statione rund um Tier und Natur. Euse chline Entdecker isch voll uf syni Choschte cho. Und am Schluss hei Jo und Ro no e Lineal mit Lupe gschänkt becho.

  
Steirych hei mir denn d’Talfahrt aträtte.

  
 Tja, das Teil do isch wärtlos. Nachdäm mir mini Charte nach langem sueche nümm gfunde hei, han ich se lo sperre…Überal hei mir gsuecht und au alli Portemonnais und Täsche usenander gnoh. Dodrbi isch nüt grossartig vermissts fürecho, aber ebe au nid die blödi Charte.

Hüt am Morge isch es denn aber sowyt gsi und d’Ma het die Charte triumphierend in dr Hand gha. Nur ebe, jetzt isch sy nur no e Stück Plastik….

Do mir hüt am Morge notfallmässig hei müesse wäsche, het d’Ma im „Wöschchäschtli“ s’Zügs zämme gsuecht und doderby au d’Charte gfunde….. Uf wytery Gäldwäschereie verzichte mir aber gärn!

  
Momentan isch es rächt gwittrig. Geschter het dr Wind die Wolke nomol möge verblose, hüt aber hei eus scho ab de halb 5i immer wieder Rägewolke gschreift. 
Geschter hei mir euses Verspräche vom Coupe go ässe iilglöst. Mir hei in Meyerhofen es Restaurant gfunde. Für d’Chinder e Chinderüberraschig, für d’Ma und Ja e Schwarzwälder Becher und für mi e Nussknacker. Z’erscht het die Glace uf sich lo warte. Parat wär sy sicher scho länger gsi, mir hei emmel mehr Creme als Glace serviert becho. D’Ro het denn au entsprächend tropft und uf Tischtuech, Stuehlchüssi hets verdächtigi Spure gha und am Bode isch es wohrlichs Schoggiseeli entstande gsi. Will das jo noni gnueg gsi isch het d’Ma denn au no ihres Glas umkippt. Es isch ab denn au klar gsi, dass sich die Maschine Wösch lohne wird….. Mir sind denn gange und hei’s em Personal überloh Tisch 22 wieder z’retabliere.

Ansunschte no e Tipp zu Mayerhofen: Am Samschtig 12:00 Uhr klappe die d’Trottoir ufe und mache fürobe.

Hüt hei mir e fulänzer Sunntig iigleit. Mit bade, spiele und enere längere Siesta isch au dä umme gange. Und ebe, jetzt gwitterets….

Hüt hei mir nach em z’Morge eusi Sache packt und sind uf Fügen in d’Therme. Dört sind mir vor zwei Johr scho es paar mol gsi und drum hei mir das au in gueter Erinnerig gha. Am Afang isch d’Ro no wie es Chlammeräffli gsi. Nach em Mittagässe isch sie denn bi dr Rampe eifach wyter ine und het vo do ah chum me welle ghebt sy. Das machts natürlich viel eifacher mit eusne drü Wasserratte. D’Ja fühlt sich in ihrem Ring sehr wohl. Eifach so uf em Arm isch ist ihre nid ganz ghür gsi. 
Uf dr Rückfahrt si denn die zwei Meitli au prompt igschloofe. Em Jo het mes denn hüt zobe guet aagmerkt, dass är kei Power Nap gmacht het. 

Euses Verspräche hüt zobe no e Coup go z’ässe isch leider ins Gwitter gfalle. D’Entüschig isch denn au gross gsi. Es het hüt vo über 30’C uf unter 20’C abgchüelet, so das mir jetzt au dr erschti Obe dinne verbringe. Morn isch jo wieder e Tag.