Blog

Uf däm Wäg möchte mir em Lars ganz härzlich zu sym hüttige Geburtstag gratuliere. Mir hoffe Du hesch hüt zobe scho no es paar Gäscht, obwohl mir zwei jo unterwägs sind…. 😉
Liebi Griess us em Zwüschehalt Disentis
RoMa

Wie dir em Bild entneh chönnet, hei eusi Drohtesel Stahlräder becho.
Nochdäm mir vo Buchs uf Chur pedalet si, isch dört scho d’RHB parat gschtande… Und wär cha so es Angebot in Anbetracht vo de Höhemeter wo mr jetzt grad überwinde usschlo?
Us em fahrende RE 1232
RoMa

Chuum si mr wieder es paar Kilometer gfahre, isch in Rorschach bereits dr nöchschti Event gsi. E internationale Sandskulpture Wettbewärb het is aglockt. Wahnsinn was die Künschtler do gschaffe hän. Uf em Bild isch isch dr 2. Platzierti Bitrag, wo aber dr Publikumspris gwunne het.

Vo dört a isch es denn aber gloffe wie gschmiert. Dr Bodesee isch scho bald hinter is gsi. Entlang vom alte Rhy hei mir inzwüsche s’dritte Land erreicht. Im öschterrichische hei mr e paar schöni Kilometer abschpuelt, bevor mr denn als Rhy-Express gschtartet sind. Dank em Ruggewind isch es scho fascht voremenelei gloffe.
So hei mir euses Etapeziel Buchs nach 88 Km scho um die vieri erreicht.

RoMa

So viel Velo-Gegeverchehr hän mr jetzt würklich no nie gha!
Kei Wunder: Zwüsche Romanshorn und Arbon isch hüt au e Slow Up gsi… E mega cooli Stimmig! Aber mir si, wie uf dr ganze bishärige Tour gegene Strom gschwumme…..
So si is hütte nid eifach es paar Velo- und Rollerbladefahrer entgegecho, sondern grad hunderti!

Hüt hei mr e ganz entspannte Tag verbrocht. So richtig zum gniesse.

Bi dr Marion hets die erschte Liche geh und au in mim Buech isch dr Kommisär Hunkeler scho flissig am ermittle.
So isch hüt die gröschti Distanz wo mir zrugg gleit hei, zwüsche Syte 1 und 86.

Amene settige Gniessertag darf natürlich au dr Gaume nid z’churz cho. Do am See isch jo klar was es git: Fisch, natürlich.

Inzwüsche sin per SMS au scho die erschte Froge itroffe:
S.M. us St. wett wüsse:
‚Wie gohts mit Muskelkater und Füdliweh?‘
Muskelkater hei mr beidi nid. Das mit em Hinterteil chunnt denn morn uf em Sattel wieder us…. Bis jetzt würde mir sälbschtverständlich jedi Dopingkontrolle problemlos bestoh!

Morn gohts denn vorerscht emol em Bodesee entlang wyter oschtwärts.

Uf ufmunterndi SMS und Wätterprognose freue mir is jederzyt!

RoMa

Fuchs du hast die Landjäger gestohlen….
Ganz gklappt hets nid. Immerhin het dr Meister Reinecke s’gschafft eus hüt z’Nacht uf trab z’halte.
Als erscht hets an eusem Abfallsäckli graschlet. Guet – zum Zält us und s’Säckli uf e Baum, zrugg und wyterschlofe.
Nach enere Stund dr nöchschti versuech. Denn isch wohl dr Duft vo de Landjäger so verlockend gsi, dass är het müesse an dr Velotäsche chratze… Also s’ganze Spieli nomol: Zum Zält us und d’Landjäger uf e Baum….
Das het gfruchtet…..
Tja, in Canada wär’s denn nid nur e Fuchs gsi…. Gäll Thomas und Roger!

Chum vom Camping los, hei mr bereits es erschts Highlight entdeckt: E Biber het sich allem Aschin ah e bitz es z’grosses Projekt vorgnoh. Sini Spure sind aber dütlich z’gseh gsi… Dr Umfang vom Baum isch zwüsche 2.5 und 3 Meter gsi!

Zrugg uf dr offizielle Route sind mir scho bald am Rhyfall gsi. Dohär stammt au euses Tagesbild.
Nach Schaffhuse isch dr Wäg denn mehrheitlich diräkt am Rhy a verloffe.
In Diessenhofen hets denn zmittag geh. Dört hei mir au dr ‚Umbau‘ vomene Rhyschiff zumene Cabrio chönne verfolge. Denn nur so losst sich die historischi Holzbrugg passiere.
Churz nach de 6i isch denn euses Tageszyl erreicht gsi. Do uf em Camping in Altnau sind mr vo dr Platzwartin unkompliziert empfange worde. Churz druff isch au scho euses Zält gschtande und dr Tagesschweiss unterwägs in Richtig Kläranlag gsi.

Wär dänkt mir würde is nur vo Sandwich und Fertigpasta ernähre irrt sich. Hüt hets en feine Pilz-Landjäger-Risotto geh. Mmmhhh……

Morn näme mr’s denn e bitz ruhiger…

Bis denn….
RoMa

Die erschti Etappe wäri also gschafft.

Nach eusem Start genau am 9i hei mir euses Ziel Flaach nach 99.31 Km wohlbehalte erreicht.

Was eus unterwägs am meischte ufgfalle isch: Wenn me dr offizielle Route folgt, fahrt me also scho e bitz im Cacao umme. Im Gegesatz dodrzue chönne d’Autifahrer eifach ebe und gradus e halbi Autobahn für sich in Aspruch neh.
Bis Schwaderloch si mr ohni längeri Pause dure pedalt. Nach em Zmittag isch es denn wyter gange. Langsam hei sich denn au die erschte Ermüedigserschinige zeigt. Churzi Päuseli sin hüffiger worde.
Die letschte 10 Km si denn mit 110 Höhemeter uf 4 Km grad nomol happig worde.
Uf em Camping acho hets nur no zwei Prioritäte geh:
1. Dusche
2. Z’Nacht ässe
Wie Dir gsehnd, hei mir is vorzüglich verpflägt….
Jetzt gniesse mr no dr Räscht vom Obe diräckt am Rhy.

RoMa

Nun ist es also soweit. Wir sind startklar.
Morgen fahren wir los. Unsere Fahrraeder sind gepackt und warten in der Garage auf Ihren Einsatz.
Vorerst geniessen wir noch einmal unser bequemes Bett zu Hause um uns morgen entspannt auf den Weg zu machen.

RoMa

Tja, so sei es nun.
Saemtliche Reisegoetter haben sich auch dieses Jahr wieder gegen uns verschworen:
1. Der Wettergott, er hat sich wohl im Kalender getaeuscht und ist vom Fruehling gleich zum Herbst uebergegangen.
2. Der Eisenbahngott, er hat beschlossen, dass auf allen passenden Zuegen die Fahrradplaetze ausgebucht sind.

Wir beugen uns diesem Druck und sind flexibel.

So sieht nun unser Plan aus:
Abfahrt ist am Donnerstag Morgen.
Doch statt dem Rhein flussabwaerts zu folgen, werden wir gegen seinen
Strom schwimmen. Ziel: Bodensee….

Wohin es von dort aus geht wissen wir heute noch nicht.

RoMa