Kategorie: Reisen

   
 
Nachdäm mir es super z’Morge bim Ruetz (Wissen, wo’s am besten schmeckt.) in Pettneu gnosse hei, sind mir in eim Rutsch wyter bis nach Aschau gfahre. Bis Innsbruck isch dr Verchehr super gsi. Fascht keini Lastwäge und dorum e Tempomat Strecki. Nach Innsbruck isch denn ei LKW am andere gfahre. So hei mir eus iigreiht und sind in dr 40-Tönner Wälle mitgschwumme… s’Tal hindere isch denn rege Reiseverchehr gsi, aber immer flüssig. 
10:44 sind mir uf em Platz gsi. Bwysbild vo dr Webcam. Nachdäm alli Hünger gschtillt gsi sind, isch denn au s’Zält schnäll gschtande. 

Dr Jo isch die ganzi Zyt mit em Velo uf em Platz umekurvt. E riesige 2.5m Doppelachswohnwage mit 3-er Kajüte het’s ihm aato. Mir wehniger bi dr Vorstellig mit däm Möbel am Hogge müesse z’fahre….

Do wär mir dä Rucksackwohnwage scho no fascht lieber. (S’Rätsel wie dä mit 3 Achse Kurve fahrt han i noni glösst…)

So, jetzt aber ab ins Bett, es isch e lange Tag si!

Ro

   
 
Zyschtig und mir sind unterwägs! Nachdäm mir alli die Adeno Vire überstande hei sind mir jetzt guter Dinge und hei aghänkt. 03:33 sind mir losgfahre. Iipackt hei mir hoffentlich alles. Em Jonas syni Liste hei mir au nomol prüeft und es isch alles abghögglet. Dr Ma ihre generalstabsmässig Masterplan hei mir hoffentlich au erfüllt. Wenn me dä studiert, chunnt me definitiv zum Schluss: Die müen zügle….

Mittlerwyle sind mir scho bim Baregg und dr Tempomat isch immer no dinne….

Nid nur bi eus heissts Abschied neh, nei ganz generell goht die Camping Saison em Ändi entgege. Bi de Durcamper hets nur no es paar ganz wenigi wo no müend cho rume und bi de „Tourischteplätz“ hets vo Tag zu Tag mehr Uswahl geh…. Kei Wunder dr Camping het au nur no bis ändi Monet offe.
Nach emene „Camper-Znacht“ in dr Raschtstätt Bellinzona hei mir dr Heimwäg unter d’Räder gnoh. Dr Tempomat isch dr bi fascht die ganzi Strecki aktiv blibe. Einzig in Luzärn hei mir wieder quer dur d’Stadt müesse. Aber das kenne mr jo scho.
Mittlerwyle stoht dr Wohnwage vor em Huus und s’wichtigschte isch bereits usglade.
Morn heissts denn no Wohnwage inne und usse putze.
Hoffentlich ohni Räge…
Das wärs denn au scho wieder gsi. Wär weiss, vilicht gits jo wieder emol e Fortsetzig…. Wobi mir denn scho uf es paar mehr Kommentär und Reaktione hoffe würde…
RoMaJo

Hüt sind mir nomol mit Wanderschueh und Rucksäck looszoge. Vor em Camping sind mir ins Postauti gstige wo is in d’Höchi nach Contra brocht het. Eusi Chauffeuse het die Strecki hüt sicher nid zum erschte Mol absolviert. Mit viel Gschick het si dr Bus dur die viele änge Kurve und Spitzcherene glänkt. Mir drü natürlich in dr erschte Reihe!
Vo Contra sind mir denn em Sentiero Collina Alta gfolgt. Nach emene wytere Ufstig sind mir höch über em See in Richtig Locarno gwanderet. Für eusi Mittagsrascht hei mir würklich s’beschte Plätzli uf em ganze Wäg breicht. In dr warme Herbschtsunne hei mir es Bänkli gfunde und erscht no mit emene super Usblick. Spöter sind mir denn wyter in Richtig Locarno-Monti gloffe. Zum Abschluss sy mir denn mit em Funicolare zrugg uf Locarno gfahre.
Deheime uf em Camping hei mir denn e feini Glace gnosse, bevor sich dr Jonas nomol im „grosse Sandchaschte“ verwylt het….
Das isch doch e Tolle Ferieabschluss gsi!
Morn heissts denn putze, packe, rume und heim fahre…
RoMaJo

Sandele isch so öppis schöns und wenn d’Sunne schiint gits erscht rächt nüt schöners. Dr Jonas het hüt Vormittag so richtig usgibig chönne wärke. Er hets absolut gnosse.
Nach sym Mittagsschlöfli sind mir denn no uf e Velotürli ufbroche. Diräkt vor em Camping chunnt me uf de Velowäg. Dä füehrt dur die grosse Fälder vo dr Magadino Ebeni entlang vom Ticino.
In Bellinzona hets denn uf d’Minute genau no uf e Zug zrugg glängt.
Die Velotour isch für e Jonas so aasträngend gsi, dass är zum z’Nacht grad fünf „Tchipolatas“ und e grossi Portion Risotto verdrückt het. Zum Dessert hei aber denn trotzdäm no es paar Smarties platz gfunde. 🙂

Uf em Camping sind geschter und hüt vieli Plätz frei worde. D’Sicht uf See und Hafe sind au vo eusem Platz us frei…. Die ganze Durcamper sind au am rume und putze. Es herrscht richtigi Saisonändstimmig…
RoMaJo

Hütt het’s öppis z’stune geh! Uf em Flugplatz het d’Heli Ticino ihres 45 Johr Jubiläum gfyret. Für eus zwei Heli-Fan natürlich Grund gnueg zum go luege!
Dr Höhrpunkt für e Ro isch dr KA-32 gsi. Dä isch nachemene Uftrag geschter no e Nacht do blibe. Am Nomitag hei mir en denn nomol ganz noch im Flug gseh. Für e Demo het er im See, grad vor em Camping, zwei mol sy Wassersack ufgfüllt.
Em Jo syni Interässe sind no sehr vielfältig. So chas au e chlini Walzi durchus mit emene Heli ufneh… 😉
RoMaJo

Tja, hüt het euse chli Ma gfunde är bruchi kei Mittagsschloof. Worum au?
Me mögti zobe nur no länger, MaPa hätte e Mittagspause, me würdi d’PC7 Staffle bim Training verpasse, und und und….
So isch es denn halt cho, dass dr Jonas nid emol me het möge rächt z’Nacht ässe…
Schlofet guet!
RoMaJo

Jo es goht! Au „zmitzt im Summer“ (Tenero: blaue Himmel, 25’c im Schatte) cha me Fondue ässe…. Es isch fein gsi und au Stunde spöter schmeckts im Zält usse no fein….
Do dr Jonas einzig Rybchees isst, het är das Fondue gänzlich verschmäht und sich lieber vo dene früsche Tessiner-Salami ernährt…. Sälber schuld, mir häns gnosse.
Wo mr grad bim z’Nacht gsi sind, hei 2 bekannti Chöpf bi eus ine gluegt. Andrea und Tabea sind uf em Wäg zur Duschi gsi. Au si sind lieber do in Süde und noni bereit für Wintercamping in dr Länk…… Dänk.
RoMaJo

Mitwuch isch Märtdag! Zumindescht in Luino. Mir hei is also uf e Wäg dört ane gmacht. Quasi in letschter Minute hei mir bim Bahnhof Magadino-Vira no e Parkplatz gfunde. So hei mir’s no rächtzytig uf e TILO em italiänische FLIRT gschafft.
Uf em Märt herscht es wohrs Sprochrwirrwarr. Schwyzerdütsch dominiert bi de Sproche und „Lümpe“ made in China dominiere bi de Chleider dütlich.
Tja, und denn isch es sowyt gsi. Dr Jonas het syni Rytirössli Premiere gha. Us sinere Sicht isch die mit dr Fahrt uf em gäle Traktor voll und ganz glückt….
Bim heime Fahre het denn dr Zug, respektive e Türe nid welle funktioniere. Wieder emol het sich dr SBB ihri Schwachstell zeigt: Kei Chundeinformation! Dr Lokifüehrer het sich uf alli Fäll alli müeh geh und isch x-mol em Zug entlang gschprunge! Schliesslich isch dr Zug gfahre und mir hei doch nid müesse vom LRZ abgchleppt wärde….
RoMaJo

Hüt hei mir bi schönschtem Wätter e Wanderig im hinterschte Verzascatal gmacht. Dr Jonas, immer no mit lediertem Finger, het im Rucksack freudig platz gnoh um sich dur die wunderbari Natur z’träge loh.
Dört wyt hinter Sonogno isch nüt meh vo dene Tourischtemasse z’gschpüre gsi, wo s’no afangs Tal überal het. Hinte im Val Vegorness churz hinter Cabioi hei mir Rascht gmacht. Mir drü hei die mitbrochte Sache us em Rucksack an dr warme, jo heisse Oktobersunne gnosse.
Uf em Ruckwäg isch es denn nid lang gange und mir hei d’Landschaft nur no z’zweit chönne bestune. Irgendwie isch immer wieder emol es liechts Schnärchele z’verneh gsi….
Bim vüre fahre isch es iidrücklich gsi, all die Lüt an de Bushaltstelle z’gseh. Öb die ächt würklich alli platz gha hei?
Zrugg uf em Camping isch denn als erschts Tenue-erlichterig agseit gsi. T-Shirt und churzi Hose sind
s’einzig richtige gsi….
RoMaJo

Dr hüttig Tag het nid grad guet aagfange. Bim ufklappe vom Chinderwage het dr Jonas mit sim Zeigfinger grad ins Scharnier zeigt, wo dr Papi s’zuklappt het. Das het vieli Tränli geh! Au zobe no het’s weh to, trotzdäm het dr Jonas bim Pfläschterli Wächsel tapfer aneghebt! Die drei Medizinal-Smarties hän uf all Fäll ganz schnäll gwirkt…
Wie geschter scho aakündigt hei mit hüt Bsuech us em Mittelland becho. MaPa us Rothrischt hei ihres GA wieder einischt meh usgnützt und sind eus cho bsueche. Em See entlang sind mir gmüetlich nach Locarno spaziert. Unterwägs hets super früschi Sandwich vo dr Ma und feine Schoggichueche vo MaPa geh.
Bim Poschte hei mir denn no e prominänti Begegnig gha. Mit eus im Lift und im Coop isch dr Chaschperli unterwägs gsi. Was dr Chasperli? Doch genau dä, oder zumindescht em Chaschperli syini Stimm. 😉 Tra, tra, trallala…
RoMaJo

Was macht me amene windige Sunntig als anderthalb Jährige Lusbueb am beschte? Genau: Rutschbahne und Rytiseili usprobiere.
So sy mir hüt uf drei verschiedene Spielplätz gsi. Uf jedem hets für e Jonas viel z’entdecke geh. Gigampfe zämme mit Mami und Papi, Rytiseile und natürlich die viele Rutschbahne abe rutsche.
Uf em Camping hei mir ringsum wieder Nochbere. Es het no erstunlich vieli Lüt. Die ganze Aargauer, St. Galler, Zürcher und Baselbieter sind klar in dr Mehrheit. Im Lädeli merkt me aber dütlich, dass es richtig Saisonänd zue goht. Es het solangs het….
Morn bechöme mir Bsuech, mehr denn aber bim nöchschte mol.
RoMaJo