Kategorie: Reisen

Hüt isch e aagwöhnigs Spatziergang uf em Programm gsi. Mir hei e chlini Wanderig quer dur s’Tal gmacht. D’Natur im „Prader Sand“, es Flussdelta vom Suldenbach, isch ganz speziell. E Eisvogel hei mr aber leider nid entdeckt. 
Am Fischerweiher hets denn uf em Spielplatz es Picknick geh. Zrugg sy mir dr glich wäg dur die brennendi Sunne gange. 

Zobe hets, nachemene Zwüschefall in dr Chuchi, es internationals Znacht vom Grill geh: Bärner Würstli im Späckmantel us Österreich, gässe in Italie mit em vom Unfall übrig blibene Salat. 

Us de Sicht vo de Ma:Hüt Morge schint de Ro in de Zytmaschine duscht z ha. Nach em grosse Wäschgang isch mir uf jede Fall e Jüngling begegnet im Vorzelt. Grad bevor ich ha welle froge, was er do suechi, het sich dä jungi Ma mit de altbekannte Stimm vom Ro bemerkbar gmacht. Sit 12 Johr het er e Schnauz gha und hüt Morge het dä Oberlippebart offebar plötzlich müesse verschwinde. I ha mi augeblicklich 12 Johr zrugversetzt gfühlt. De Kommentar vo de Jana: „Papi jetzt bisch nümm stachlig“. Und ich ha chum chönne glaube, dass ich mit dem junge Ma scho so e grossi Familie ha!

Zum Glück het d’Ma eusi Reiseapothek rych bestückt. Dr Ja isch es nur mit Zäpfli einigermasse guet gange. In dr Nacht isch nur s’Mami rächt gsi. Wo ich zu ihrem Bett cho bi, het sy in de höchschte Tön afo chreie. Super mit zwei schofende Chind und Nochbere nur es paar Meter näbe dra. So hei mir die erschte 3 Ferie Täg sehr ruhig aagange. Quasi UWU. (Um e Wohnwage umme)

Es isch spannend wie sich do 3 Kulture mische. Alles isch zweisprochig agschribe und d’Lüt rede e luschtige Dialäkt. Es chunnt eim überhaupt nid wie Hochdütsch vor. Bim poschte fühle mir eus wie in Österreich. E MPreis isch in Jana Fuess-Distanz vom Camping wäg. Do fühlt me sich wie im Zillertal: Milch und Joghurt gits vo dr Erläbnis-Sennerei. Dr Ma ihri Lieblings Joghurt hets sogar!

Uf em Camping hets nur Chinder us Deutschland. Sogar d’Ja probiert ihres beschte Hochdütsch us. Süss. Irgendwie verstönde si sich eifach.  

Irgendwie wird das vo Johr zu Johr mehr zum Packe. 

Das muess aber es Gfühl sy, denn mir Packe syt Johre nach dr gliche Lischte. 

So e paar Sache sind aber au vo dr Lischte verschwunde: Kinderwagen, Schoppefläsche, usw. 

Chriblig sind alli drei Chinder gsi und im Helfer Drang. Das machts nid immer eifacher bim packe…..

Uf dr Raststätt Heidiland isch denn Znünipause agseit gsi. S’Heidi und dr Geisse-Peter sind au no cho luege. Mir sind scho wyt cho, bis sich die erschte chrankets Symptom zeigt hei. Dr Ja isch es nümme guet gange. So isch dr Jo zu mim Co-Pilot worde und d’Ma zur Pfläghilf in dr Kabine. Die Ufgob isch im dopplete Sinn aspruchsvoller worde: Immer mehr Kurve und dr Ja isch es au nid besser gange.

Bim Vereina Tunnel hets eus just uf 11:50 Zug glängt und nach 20 verrüttlete Minute sind mir im rägnerische Engadin gsi. Wyter über e Ofepass und s’Münstertal sind mir em Zyl entgegegfahre. Nid dr Pass isch d’Useforderig gsi für e Fahrer, sondern die änge Dörfli uf dr italiänische Syte. Solang nüt entgege chunnt gohts jo….

Zu dr fiebrige Ja isch denn au no e Ma mit Dachschade cho. Die wo dänke das syg nüt neus chönne süscht gärn emol e Zältstange uf e Chopf donneret becho.

Chum syn mir mit ufbaue fertig gsi isch denn au Zält und Wohnwage duscht worde. Mir im trochene heis fascht scho chönne gniesse abgseh vo de 40’C Fieber vo dr Ja. 

Es isch fascht nid zum glaube. Zum Abschluss het s’Wätter doch nomol erbarme gha mit eus. Nachere iischalte Nacht (I ha eigentlich nid mit Wintercamping grächnet…) isch d’Sunne am Mittag denn dur e Hochnäbel cho und het zämme mit emene fine Lüftl für gueti trochnigs Bedingige gsortgt. So isch euses Zält troche in dr Hülle glandet. S’Auto isch bis uf d’Velos au glade.

D’Ja het bi all däm tribe gar nid welle es Mittagsschlöfli mache. Sy het lieber im Bett alles usenander gnoh wo sy gfunde het. Do die 3 am Morge nomol im Topi-Club am Zwergrl-Morge bi dr Erika gsi sind wär si am Mittag scho tod müed gsi… So isch es denn mit allne 3 rächt aasträngend worde.

Zum Glück han ich mi dure gsetzt und mir sind in Alpezoo gange. D’Alternative Dampfzug fahre hätti kläglich verseit. Nach Fügen sind nämlich d’Schine demontiert worde und es git en Busersatz…

Im Alpezoo sind mir warm iipackt uf d’Rundi gange. Pünktlich zur Mittagszyt si mir wieder bi de Wölf gsi. Was sich bewährt sell me wiederhole. So isch euses Picknick Plätzli au klar gsi. Näbe de zwei fulänzende Wölf hei mir es super Plätzli zum beobachte und ässe gha. 

Alli Tier hei e Patenschafte. Wär vo Euch verrotet wär Pate vo de Elch isch, cha dört grad no go Fleischbälleli ässe…

Wie guet, dass sich d’Bartgeier und Murmeli würklich verträge isch eus no es Rätsel. S’Murmeli isch uf all Fäll flink gnueg um rächzytig in einere vo syne Gäng z’verschwinde.

Es Highlight isch zum Abschluss no dr Brunbär gsi. Dä het zerscht no gfulänzt und isch plötzlich ufgstande. Är het genau gwüsst, dass es jetzt z’Ässe git. E Stück Fisch het me drvo erkennt. Är het alles us em Pool müesse fische und drbi sichtlich Spass gha. So hei mir dä Bär no nie erläbt gha. 

 Hüt isch ändlich wieder emol passabels Wätter gsi. 
Mir sind zur Talstation vo dr Zillertalarena gange. Dört hets e grosse Spielplatz und e Rodelbahn. E tolli Attraktion für Gross und Chli, nur leider no rächt tür. Dr Jo wäri sofort nomol mitcho…

​Bi dr Zillertaler Schauchäserei hei mir denn am Heubuurefescht e Halt iigleit. Feine Honig hei mr dört am Märt gfunde. Süscht isch es vorallem es Trink- und Ässfescht mit zweitklassiger Musikalischer beschallig gsi. Do isch doch Velo- und Trottifahre uf em Camping für die grosse zwei und Buech läse für Ro und Ma viel besser gsi. Die musikalischi untermohlig isch do vomene Eidgenoss mit sim Schwyzerörgeli cho….

Die drü chline wärde do no zu richtige Wasserratte. Sogar d’Ja hets erlikt und schwaderet mit ihrne Flügeli wie e Änte im Backi umme. Die beide grosse gönge abwächsligswys zur Ma go üebe. Und sy maches vo mol zu mol besser. So gits im Schwimmlehrbuech „Gumpifrosch“ au immer wieder Chläberli für die gschaffte Ziel zum iichläbe.

Am Dunnstig Vormittag sind alli drü im Topi-Club gsi. Si hei sozäge e Privatstund mit dr Erika gha. Eusi sind an däm Morge nämlich die
einzige Chinder im Club gsi…

Gmolt und gschpilt und dusse e Spatziergang gmacht. Es hett allne passt. Vor allem d’Meitli sind denn aber scho gschafft gsi. 

Und s’beschte drbi: Ro und Ma hei zwei Stund rueh gha! Fascht beängstigend die Stilli um eim umme….

Hüt am Morge sind denn Dr Jo und d’Ro wieder gange und hei e Indianerschmuck bastlet….

Dr Ma isch es scho geschter wieder besser gange und s’Fieber isch wäg gsi. Churz und heftig. 

Au im Schwimme mache die zwei Grosse tolli Fortschritt. D’Ro het e mega Stolz dass sie jetzt au cha tauche und das sogar mit offene Auge!

Dr Jo het jetzt doch au no d’Rutschbahn entdeckt und fascht nümme hei welle.

So langsam het sich die ganzi Familie wieder ans Camperläbe gwöhnt. Mit allne Vor- und Nochteil….. Nur das mit em schlofe klappt mit dr Ja nochwievor noni besser. Sobald si ins Bett setti, gits Gegewehr….

Wär isch dr gröschti Angschthaas in eusere Familie? Uflösig folgt…

Nachdäm mir im verchehrte Huus gsi sind hei mir grad näbe dra au no s’Dschungelhuus bsuecht. Nach em extrem chalte Inntal Wind isch es tropisch wyter gange. Als erschts isch es in e riesigi Voliere mit frei fliegende Papageie gange. Die sind überal umme gfloge. Die hei zwar au lärme gmacht, aber em Jo sys gekeische het alles übertönt! D’Ja isch nid druss cho und het vor Angscht uf em Arm nur no zitteret. So hei mir is das nid vorgschtellt…. So isch is nüt anders übrig blibe als wyter z’goh.

Im nöchschte Rum isch es denn friedlicher worde. Die viele Schmätterling hei au niemerem öppis chönne mache… Im dritte und letschte Teil sind denn Chäfer, Heu- und anderi „Schrecke“ und natürlich diversi Spinne gsi. Naja, au nid d’Lieblingstier vo eusere Familie. 

Wie vor drü Johr hei mir denn e Mittagsstopp im Gourmet TeMpel gmacht. D’Ro het damals dört zum erschte Mol Pomfritt gha…

Die diverse Läde äne an dr Stoss hei denn no zum lädele verlockt. 

Tja, und jetzt lyt d’Ma wo dr ganz Tag scho nid fit gsi isch do und het (tendenz stygend) 38•C Fieber und friert vor sich ane…..
PS: D’Kaffi-Krise hei mir geschter no beändet gha. Dank em Tipp vo MaPa sind mir bim Elektro Sporrer in Mayerhofen uf ahieb fündig worde… Und jetzt im Bsitz vonere neue Nespesso Pixi Maschine. Wobi d’Ma momentan nur no Tee trinkt….

Tja, hüt Vormittag hei mir welle taluswärts fahre. Scho bi dr Uffahrt zur Schnällstroos sind mir in Stau cho. Mir hei bis zur nöchste Usfahrt e gfühlti Ewigkeit brucht. So sind mir entgege eusne Plän nur bis Kaltenbach und dört in M-Preis go iichaufe. 

So isch euses Kaffi-Problem halt immer noni glöst. Nach em Mittagässe, wo d’Ja ändlich gschlofe het, si mir zwei in Beach-Café. Jo und Ro hei mit Fünkli usgrüschtet uf die schlofendi Ja ufpasst. So sind mir doch zumene Cappuccino und enere halb Stund Ferie cho….

Pünktlich zur Brötli-hohl-Zyt hets afo rägne. Mit Schirm bewaffnet isch dr Jonas („Ich wett das lehre….“) mit Ma und Ro ins Lädeli spatziert. Scho bi dr Milch hinde het me müesse aastoh. Dr Platz isch immer no fascht voll. Entsprächend gross isch dr Aasturm uf d’Brötli gsi. 

D’Ro isch zum Wohnwage Bauer worde. Si lehrt grad Lego Plan läse und baue. 

Dank em Räge hei mir so jetzt scho e neui Kaffimaschine. Nur leider passe eusi Tassli nid drunter….