Wie gwohnt isch am Tag vo eusere Aakunft eifach nur heiss! Kei ahnig, wo das Wasser won ich inegleert ha verschwunde isch… Alwä verdampft!
D’Happy Hour Pizzas vom Jägerhof sind fein gsi. Trotz früehschtem Tagwach isch es spot worde. Bi mehr als 30’C isch au nid an Schlofe z’dänke. An eusem nöchschte Wohnwage hets denn au so e lärmigi Klimaalag uf em Dach…
Dr Mond het sich verzoge und eusi Velos fahre mit 80 uf dr Autobahn de Ferie entgege. 7:10 hei mir d’Gränze passiert.
Nach em Kampf mit em Zuebehör vom letschte Johr chunnts in däm Johr mit euse Mit-Camper no viel besser….
Kapitel 1: Deutsche Familie
Agfange hets mit enere dütsche Familie direkt näbe eus.
Es eifachs Rätsel:
Es het an jedem Wohnwage vier drvo, sind us Stahl und wärde mängisch dräckig….
Richtig: Stütze!
Zuesatzfrog: Um dr Wohnwage möglichscht stabil z‘ha; wieviel Stütze sette an Bode cho?
Richtig: vier
Aber zrugg zu dere Familie. Nach ihrer erschte Nacht won i zum WC bi, han i mi gfrogt, öb i ächt noni rächt gseh. Hinde links isch d‘Stütze 5 cm in dr Luft gsi. Bim z‘morge hei hei mir denn die Schaukle au würklich in Bewegig gseh. Also ich wär seechrank worde! D‘Steigerig chunnt aber erscht no. S‘Familieoberhaupt het das Missgschick entdeckt und dr Triebel gholt. Resultat vo dere Aktion: Hinde links isch d‘Stütze am Bode, drfür isch die vorne rächts in dr Luft…. Dr Seismograph het also wyter usgschlage.
Kapitel 2: Dänische Familie
Schreg vis a vis vo eus isch e dänischi Familie izoge. VW Bus mit Eltere, 1 Meitli, 3 Buebe und Hund. Wie die genau in däm Wohnwage schlofe isch eus es Rätsel. Ihri ganzi Chuchi und Läbensmittel hei sy uf all Fäll unter ihrem Vordach usbreitet. Das
Loht dr Schluss zue, dass anstell vo de Chäschtli und Chuchi wyteri Better Platz gfunde hei. Egal, au nid euses Problem. Nur: Hüt isch ihres Puff voruss ziemli Nass worde. S‘Vordach het däm Windli nämlich nid stand ghalte und het über e
Wohnwage übere e Abflug gmacht. D‘Stimmig bi ihrer Rückkehr isch denn au rächt chüel gsi. Mitleid mues me aber würklich keis ha: Wär glaubt, dass so
Schnüer nur Stolperfalle sind und se dorum lieber nid montiert muess au mit de Kosequenzen chönne umgoh.
Was lehrt me do druss: Es mues jo nid immer e Sturmabspannig sy, aber es paar Heering und Schnüer chönne doch hälfe.
So hei mir is hüt zobe gfrogt öb das ächt e Gschäftsidee wäri: E Camping Schuel mit Prüefig und Diplom. Nur eis chönnt me au dört nid vermittle: GMV! (Gsunde Menscheverstand)
Dr Sunne entgege sind mir unterwägs. D’Ma het s’Stür übernoh und gondlet eus suverän ostwärts. In dr zweite Reihe isch nüt vo Rueh z’merke. Es sind glaub alli 3 z’chribelig um nomol dr Schlof z’finde.
Au in däm Johr isch d’Zyt viel z’schnäll umme gange. Sogar d’Ma het sich ans Südtirol gwöhnt und wär denn no gärn länger blibe. Aber all das nützt nüt. Dass d’Chinder grösser wärde merkt me au bim ufrume. Es wird eifacher mit allne drü. Dr Jo und Ja putze Hering und d’Ro hilft hebe bim Schürze putze… So hei alli ihri Ufgob. Zumindescht zytewys. Mit em Blick uf e Rägeradar hei mir in 3. Gang gschalte und s’Zält möglichscht gli zämme gno. Gschafft. Wo’s agfange tröpfele het isch alles sowyt zämme und im trochene gsi. Wieder emol Glück gha!
Zrugg sind mir denn wieder dr glichi Wäg gfahre wie bi dr Hireis. S’Wätter isch au öppe glich gsi. So het sich s’Engadin vo dr hässliche Syte zeigt. Vo über 25’C im Südtirol uf 12’C in Zernez. Brr!!! Do i keini Schneekette drbi gha ha, isch klar gsi, dass mir wieder uf e Verlad gönge. Zämme mit em spötere z’Nacht im Heidiland zwei türi Späss in Franke pro Minute grächnet.
Dank em Mover stoht denn sogar bim usrume nümm alles schreg:
Inzwüsche sin 5 Maschine Wösch gwäsche, tröchnet und zämme gleit. Dr Wohnwage isch au putzt und parat für e nöchscht Isatz im Herbscht.
(Camper mit automatischer Sat Schüsse unter Baum)
Also hüt hei mir wieder emol chönne beobachte, wie anderi bim Campe ihri Prioritäte setzt:
1. Camper uf dr Parzälle quer stelle, so dass es 5 Minute motoret
2. Sat Spiegel ufstelle und dr Satelit automatisch lo sueche
3. Sich nach dr 3 Rundi vom Spiegel langsam afo närfe und zur Beruhigig schnäll e Zigi aazünde.
4. Zigi wäg und wieder dr Motor aalo drmit me dr Camper e Meter wyter näbene Baum bringt.
5. Sat Spiegel wieder ufrichte und e neue Versuech starte.
6. E chline Freudesprung mache wo dr Spiegel ändlich stoh blibt.
7. D’Kabelrolle uszieh um au dr TV mit Strom chönne z’versorge um s’Bild chönne kontrolliere.
8. Feschtstelle dass dr Camper gar nid grad stoht.
9. Nomol afange Motore dass dr Camper uf d’Blöck ufe chunnt und dass er so öppis wie grad stoht.
10. Nomol kontrolliere öb dr Sat Empfang immer no guet isch.
11. Teppich usbreit
12. Sunnestore vo Hand usekurble (Chönnti me süscht sicher au elektrisch ha!)
13. ……..
D’Chinder hei hüt nomol chönne mit dr Marni spiele, bevor s’hüt zobe zumene härzzerrissende Abschid cho isch.
Au bi eus gohts langsam ums Rume. Die erschte Sache sind bereits verstaut.
Jetzt hoffe mir morn uf trochäs Wätter, dass au s’Zält no troche in dr Täsche landet.
E vorussichtlich letschti Wanderig isch hüt uf em Programm gschtande. Dr Gumperle Wäg. E Rundwäg mit vielne Pöschte wo d’Waldmuus Ferdinand Sache vo de andere Waldtier erklärt. Uf em Wäg zum Rundkurs sy mir über e Wallfahrtswäg gloffe. E Umwäg, aber vor allem dr Jo isch sehr interessiert gsi an dene Holztafele.
Uf em eigentliche wäg denn, isch d’Ja dr gröschti teil sälber gwanderet. Schliesslich het jo au sie cooli Wanderschueh a. Bim „Dachsbau“ het d’Ma denn die feine Sandwich us em Rucksack zauberet. D’Ja het sich immer wieder müesse versichere, dass de Dachsbau numme zum spiele isch. (Zum Glück hei mir usser Waldameise keini andere, grosse läbige Tier aatroffe!)
Die gsammlete Stäckli het d’Ma denn, zämme mit em Jo, in es währschaftigs Floss verwandlet. Im Abwäschbecki hets bereits e erschte Schwimmtest mit Bravour bestande.
Hüt isch euses Auto zum zweite Mol zum Zug cho. Mir sind nach Meran go shoppe. Es Manko vo de letschte sächs Johr hei mir besytigt. Ändlich hets bi eus im Wohnwage au e Wöschständer. Scho mol dört, si mir denn in d’Meraner Therme go bade. Eusy Äss-Zyte sind in denne Ferie rächt verschobe. Das git bim Heimcho sicher e rächte Jet-Läg… Am achti zobe sind mir so zum Gourmet Tempel go z’Nacht ässe.
Nach so emene asträngende Tag isch am nöchste Tag Erholig aagseit gsi. Au rund um e Wohnwage isch immer öppis gloffe.
Dr Samschtig het nomol dr letschti Hitzetag versproche. Drum isch nomol Badi uf em Programm gschtande. Eusi chlinschti isch die gröschti Wasserratte vo allne! Mit Flügeli üebt sy jetzt scho dr Ruggeschwumm. Uf de Rutschbahne hei denn wiedr alli ihre Spass gha. Mit em 1.20 Meter tiefe Becki isches genial für eus. Dr Jo cha stoh und tauche und RoJa schwimme mit de Flügeli sälbständig umme. So chömme alli uf ihri Rächnig.
Am Sunntig isch den das wächselhafte Wätter do gsi. Immer wieder hets emol grägnet. Langi Zyt sind mir aber glich vor em Zält usse gsi und händ s’Camperläbe gnosse. D’Ro fahrt mit ihrem grosse Velo scho sehr guet umme. Schad, dass es do kei Rundwäg git. Momentan isch es au zobe no so Warm, dass mir chönne im Zält sitze.
Do um Prad rächt viel Nationalpark isch, gits au nid so viel Uswahl an Seilbahne. Uf e Tipp vo Lüt uf em Camping si mir uf e Watles gange. Vo 917 Meter über Meer per Auto uf 1750 und denn mit em „Eilbänli“ (Zitat:Ja) uf über 2100. Uf dere Höchi obe hets e Badesee mit villne Aktivitäte. Mir sind vo dört us no e Stück wyter dr Bärg uf gwanderet. Näb em Pfaffensee isch grad es Bänkli mit super Ussicht ins Tal frei worde. Die Glägeheit hei mir is nid lo neh und so hei mir bim Picknik vo wytem au no es paar Gleitschirmpilote bi ihrne Vorbereitige und Start chönne beobachte. D’Thermik isch super gsi, so guet dass es eine bis zu de Wolke gschafft het.
Uf dr Bärghütte isch denn Apfelstrudel (mit oder ohni Vanillesauce), Glacé oder e heissi Schoggi zum Zvieri agseit gsi.
Zrugg ins Tal sy mir trennti Wäg gange. MaRoJa wieder mit em 4er-„Eilbähnli“ und RoJo mit emene 3-rädrige „Go-Cart“. Das hett Spass gmacht!
Au in de Bärge chas heiss wärde. So isch hüt dr Bsuech im Prader Schwimmbad aagseit gsi. Am Vormittag isch es no guet gsi mit de Lüt. Alli 3 hei dr Plausch am aberutsche gha. Chum dunde, scho wieder am Start. Nach 3 Probeläuf mit em Jo isch d’Ja wie verbisse sälber go rutsche. E mega Spass.
Am Obe isch es Konzärt vo dr Musikkapelle Eyrs uf em Hauptplatz agseit gsi. Me hets bis zun Wohnwage ghört. So isch dr bereits pitschleti Jo nümme z’brämse gsi und het sich nomol aagleit. So sind RoJo no zumene Platzkonzärt cho, währenddesse d’Ma zu RoJa gluegt het.
Musikkapelle Eyrs mit dr Fuchsgraben Polka (Video folgt…..)
